އިންޑިއާގެ އާމީ އިންފެންޓްރީ ސްކޫލުން ހިންގި ކޯހެއް ރ. ވާދޫ ޒިޔާން ފުރިހަމަކޮށްފި

އިންޑިއާގެ އާމީ އިންފެންޓްރީ ސްކޫލް، މާއޯގައި ކުރިއަށްގެންދިޔަ ޖޫނިއަރ މޮޓަރސް ކޯސް 237 ރ. ވާދޫއަށް ނިސްބަތްވާ އަޙުމަދު ޒިޔާން މުޙައްމަދު ކާމިޔާބުކަމާއެކު ފުރިހަމަކޮށްފިއެވެ.

މި ކާމިޔާބީއާ ގުޅިގެން ރ. ވާދޫ ކައުންސިލުން ވަނީ ޒިޔާންއަށް މަރުޙަބާ ކިޔައި، އެކަން ރަސްމީކޮށް ފާހަގަކޮށްފައެވެ. ވާދޫ ކައުންސިލުން ބުނެފައިވަނީ ޒިޔާން ހޯދި މި ފަޚުރުވެރި ކާމިޔާބީއަށްޓަކައި، ކައުންސިލާއި ރ. ވާދޫގެ އެންމެހާ ރައްޔިތުންގެ ނަމުގައި އޭނާއަށް އިޚުލާޞްތެރި ތަޙުނިޔާއާއި މަރުޙަބާ ދަންނަވާ ކަމަށެވެ.

އިންޑިއާގެ މާއޯގައި ހުންނަ އާމީ އިންފެންޓްރީ ސްކޫލަކީ އަސްކަރީ ދާއިރާގެ އެކި ފަންނުތަކުން މީހުން ތަމްރީނުކުރުމުގައި ފާހަގަކޮށްލެވޭ މަރުކަޒެކެވެ. ޒިޔާން ފުރިހަމަކުރި މި ކޯހަކީ އޭނާގެ މަސައްކަތުގެ ދާއިރާއިން އިތުރު ހުނަރާއި ތަޖުރިބާ ލިބިގެންދިޔަ މުހިންމު ތަމްރީނެކެވެ.

ރ. ވާދޫއަށް ނިސްބަތްވާ ޒުވާނަކު ބައިނަލްއަޤުވާމީ މިފަދަ ތަމްރީނު މަރުކަޒަކުން ހިންގި ކޯހެއް ފުރިހަމަކުރުމަކީ އެ ރަށުގެ ރައްޔިތުންނަށް ލިބުނު ވަރަށް ބޮޑު އުފަލެއްގެ ގޮތުގައި ކައުންސިލުން ވަނީ ސިފަކޮށްފައެވެ. ޒިޔާންގެ މި ކާމިޔާބީއަކީ އޭނާގެ ކުރިމަގަށް ލިބުނު ވަރަށް ބޮޑު ކުރިއެރުމެކެވެ.