ވާދަވެރި މެޗަކަށްފަހު އިންގްލެންޑުން 3 ޕޮއިންޓް ކަށަވަރުކޮށްފި

ވޯލްޑް ކަޕުގެ "ގްރޫޕް އެލް"ގެ ފުރަތަމަ މެޗުގައި އިންގްލެންޑުން 4-2ގެ ނަތީޖާއަކުން ކްރޮއޭޝިއާ ބަލިކޮށް 3 ޕޮއިންޓް ކަށަވަރުކޮށްފިއެވެ.

ދެ ޓީމުގެ ފަރާތުން ވެސް ވާދަވެރި މޮޅު ކުޅުމެއް މި މެޗުގައި ވަނީ ފެނިގެންގޮސްފައެވެ.

މެޗުގައި އިންގްލެންޑުން ފުރަތަމަ ލީޑު ނެގީ މެޗުގެ ކުރީކޮޅު ލިބުނު ޕެނަލްޓީއެއް ކާމިޔާބުކޮށްގެންނެވެ. އެ ލަނޑު އެ ޓީމަށް ކާމިޔާބުކޮށްދިނީ ކެޕްޓަން ހެރީ ކޭންއެވެ.

އެއަށްފަހު މެޗުގެ 36ވަނަ މިނެޓުގައި ކްރޮއޭޝިއާއިން ވަނީ ނަތީޖާ ހަމަހަމަކޮށްފައެވެ. 1-1އަށް ނަތީޖާ ބަދަލުކޮށްލީ މާޓިން ބަޓުރީނާއެވެ.

މެޗުގެ ފުރަތަމަ ހާފު ނިމެން ކައިރިވެފައިވަނިކޮށް އިންގްލެންޑުގެ ކެޕްޓަން ހެރީ ކޭން ވަނީ އަނެއްކާވެސް ޓީމަށް ލީޑު ނަގައިދީފައެވެ. އެހެންނަމަވެސް މެޗުގެ ފުރަތަމަ ހާފު ނިމިގެންދިޔައީ 45 މިނެޓުގެ ކުޅުން ހަމަވެ ދެއްކި އިތުރު ވަޤުތުގެ ތެރޭގައި ކްރޮއޭޝިއާއިން އެ ޓީމުގެ ދެވަނަ ލަނޑު ޖަހައި 2-2އަށް ނަތީޖާ ބަދަލުކޮށްލުމަށްފަހުއެވެ.

ފޯރިގަދަ، އަދި ގިނަ ލަނޑުތަކެއް ފެނިގެންދިޔަ މި މެޗުގެ ދެވަނަ ހާފު ފަށައި މާގިނައިރުތަކެއްނުވެ އިންގްލެންޑުގެ ޒުވާން ކުޅުންތެރިޔާ ޖޫޑް ބެލިންގހަމް ވަނީ އެ ޓީމަށް 3ވަނަ ލަނޑު ކާމިޔާބުކޮށް ލީޑު ނަގައިފައެވެ. އަދި އިންގްލެންޑުގެ 4ވަނަ ލަނޑު އެ ޓީމަށް ކާމިޔާބުކޮށްދިނީ ބަދަލު ކުޅުންތެރިއެއްގެ ގޮތުގައި ދެވަނަ ހާފުގައި ކުޅެން ނުކުތް، ބާސެލޯނާގެ ފޯވާޑް މާކަސް ރަޝްފޯޑެވެ.

މެޗުގެ 85ވަނަ މިނެޓުގައި ރަޝްފޯޑް ކާމިޔާބުކޮށްދިން ލަނޑާއެކު 4-2ގެ ނަތީޖާއަކުން މެޗު ނިމިގެންދިޔައިރު މެޗުގައި ކްރޮއޭޝިއާއަށް ވެސް ވަނީ ލަނޑު ޖަހާނެ ރަނގަޅު ފުރުޞަޠުތަކެއް ލިބިފައެވެ.

"ގްރޫޕް އެލް"ގައި މި ދެ ޓީމުގެ އިތުރުން ދެން ހިމެނެނީ ޕެނަމާއާއި ގާނާއެވެ.

މުބާރާތުގެ ގްރޫޕް ސްޓޭޖުގައި އިންގްލެންޑް ދެން ބައްދަލުކުރާނީ ގާނާއާއެވެ. އަދި ކްރޮއޭޝިއާ ނުކުންނާނީ ޕެނަމާއާ ދެކޮޅަށެވެ.