ވާދޫ ސްކޫލުން ވިދިވިދިގެން 5 ވަނަ އަހަރު ގައުމީ ގަދަ 10 އަށް!

މިއަހަރުގެ ފެބުރުއަރީ އަދި މާޗު މަހު ބޭއްވި ސެކަންޑަރީ ސްކޫލް ސެޓްފިކެޓް (އެސްއެސްސީ) އަދި އޯލެވެލް އިމްތިހާނުގެ ރަސްމީ ނަތީޖާ މިއަދު ދޫކުރަން ފަށާފައިވާއިރު، ރ. ވާދޫ ސްކޫލުން ވަނީ ވިދިވިދިގެން ފަސްވަނަ އަހަރަށް ގައުމީ ގަދަ 10 އެއްގައި ހިމެނި ބޮޑު ކާމިޔާބީއެއް ހޯދާފައެވެ.

ޑިޕާޓްމަންޓް އޮފް ޕަބްލިކް އެގްޒަމިނޭޝަންސް (ޑީޕީއީ) އިން ހާމަކުރި ގޮތުގައި މިއަދު މެންދުރު 12:00 އިން ފެށިގެން ދަރިވަރުންނަށް ނަތީޖާ ދޫކުރަން ވަނީ ފަށާފައެވެ.

މިދިޔަ ދިރާސީ އަހަރުގެ އޯލެވެލް އިމްތިހާނުގައި ވާދޫ ސްކޫލްގެ ދަރިވަރު އިޒްހާން ޢަބްދުލް މަތީން ވަނީ ގައުމީ ގަދަ 10ގެ ފަސްވަނަ މަގާމު ހޯދާފައެވެ. އެންމެ 88 ދަރިވަރުންގެ ކުޑަ އާބާދީއެއް އޮންނަ މި ސްކޫލުން މިފަދަ ނަތީޖާއެއް ހޯދުމަކީ ރަށަށް ލިބުނު ބޮޑު ފަޚުރެކެވެ. ސްކޫލްގެ ޕްރިންސިޕަލް އިސްމާއީލް ނަސީރު ފާހަގަކުރެއްވި ގޮތުގައި، ދަރިވަރުން މި ކާމިޔާބީ ހޯދަމުންދަނީ އެއްވެސް އިތުރު ޓިއުޝަނަކާ ނުލައި، މުދައްރިސުންނާއި ދަރިވަރުން ކުރާ ބުރަ މަސައްކަތުންނެވެ.

ނަތީޖާ ދޫކުރުމުގެ އިންތިޒާމުތަކަށް ބަލާއިރު، ސްކޫލްތަކުން އިމްތިހާނު ހެދި ދަރިވަރުންނަށް ނަތީޖާ ދޫކުރާނީ އެ ދަރިވަރަކު އިމްތިހާނު ހެދި ސްކޫލަކުންނެވެ. އަދި އަމިއްލަ ގޮތުން ބައިވެރިވި ކެނޑިޑޭޓުންނަށް ނަތީޖާ ދޫކުރާނީ ކުރިން އިއްޒުއްދީން ސްކޫލް ހިންގި އިމާރާތުގައި ހުންނަ ޑީޕީއީގެ އޮފީހުންނެވެ. ރަސްމީ ބަންދު ނޫން ކޮންމެ ދުވަހެއްގެ ހެނދުނު 08:30 އިން މެންދުރުފަހު 13:30 އާ ހަމައަށް ނަތީޖާ ދޫކުރުމުގެ މަސައްކަތް ކުރިއަށްދާނެއެވެ.

ވާދޫ ސްކޫލްގެ ނަތީޖާއަށް ބަލާއިރު، ފާއިތުވި ހަތަރު އަހަރު ފާސްވި ނިސްބަތް 75 އިންސައްތައިން މަތީގައި ހުރި ނަމަވެސް، މިދިޔަ އަހަރު އެ އަދަދު ވަނީ 53 އިންސައްތައަށް ދަށްވެފައެވެ. ޕްރިންސިޕަލް ވިދާޅުވީ ސްކޫލްގެ އާބާދީ ކުޑަވުމުން އެންމެ ދަރިވަރަކު ފާސްނުވި ނަމަވެސް ޖުމްލަ އިންސައްތައަށް ބޮޑު ބަދަލެއް އަންނަ ކަމަށެވެ. އެހެންނަމަވެސް، ދިވެހި، އިސްލާމް، އިނގިރޭސި، އެކައުންޓް އަދި ބިޒްނަސް މާއްދާތަކުން ދަރިވަރުން ވަނީ ފާހަގަކޮށްލެވޭ ރަނގަޅު ނަތީޖާތަކެއް ހޯދާފައެވެ.

މިއަހަރަކީ ދިރާސީ އަހަރުގެ ފެށުން ޖެނުއަރީއަށް ބަދަލުކުރުމާ ގުޅިގެން ދެ ބެޗެއްގެ ދަރިވަރުން އޯލެވެލް ހަދާ އަހަރެކެވެ. ފެބުރުއަރީ/މާޗު މަހު އެއް ބެޗު ނިމިފައިވާއިރު، ދެވަނަ ބެޗުގެ އިމްތިހާނު އޮންނާނީ މިއަހަރުގެ އޮކްޓޯބަރު/ނޮވެންބަރު މަހުގައެވެ. ވާދޫ ސްކޫލުން އަމާޒު ހިފާފައިވަނީ ކުރިއަށް އޮތް އިމްތިހާނުތަކުގައިވެސް ގައުމީ ފެންވަރުގެ ވަނަތައް ދަމަހައްޓައި، ނަތީޖާ އިތުރަށް ރަނގަޅު ކުރުމަށެވެ.