ވާދޫ ލައިވްގެ ފަރާތުން ވާދޫ ސްކޫލަށް ޕްރޮފެޝަނަލް އޯޑިއޯ ކިޓެއް ހަދިޔާކޮށްފި

ވާދޫ ލައިވްގެ އިޖުތިމާއީ ޒިންމާގެ ދަށުން ތައުލީމީ ދާއިރާއަށް އެހީތެރިކަން ފޯރުކޮށްދިނުމުގެ ގޮތުން، ޕްރޮފެޝަނަލް ސްޓޫޑިއޯ އޯޑިއޯ ކިޓެއް ވާދޫ ސްކޫލަށް ހަދިޔާކޮށްފިއެވެ. މި ކިޓުގައި ދެ ކޮންޑެންސަރ މައިކްރޯފޯން ސެޓް ހިމެނެއެވެ.

މި ތަކެތި ސްކޫލާ ރަސްމީކޮށް ހަވާލުކޮށްފައިވަނީ އާދީއްތަ ދުވަހުގެ ރޭ ހުޅުމާލޭގައެވެ. ވާދޫ ލައިވްގެ ފަރާތުން މި ތަކެތި ހަވާލުކޮށްދެއްވިއިރު، ސްކޫލުގެ ފަރާތުން މި ތަކެއްޗާ ހަވާލުވެލެއްވީ ޕްރިންސިޕަލް އިސްމާއިލް ނަސީރު އެވެ. ތަކެތި ހަވާލުކޮށްދެއްވީ ވާދޫ ލައިވްގެ އެޑިޓަރ އިން ޗީފް ޒިދާން މުޙައްމަދެވެ.

މި އެހީގެ ސަބަބުން ސްކޫލުގެ މީޑިއާ އަދި މުއާސަލާތީ ގާބިލުކަން އިތުރުވެގެންދާނެ ކަމަށް ބެލެވެއެވެ. ވަކިން ހާއްސަކޮށް، ބްރޯޑްކާސްޓްކުރުމާއި، މީހުންގެ ކުރިމަތީގައި ވާހަކަދެއްކުމުގެ އިތުރުން ޑިޖިޓަލް ކޮންޓެންޓް އުފެއްދުމުގެ އަމަލީ ހުނަރުތައް ތަރައްގީކުރުމަށް ދަރިވަރުންނަށް އަގުހުރި ފުރުސަތުތަކެއް މިކަމުގެ ސަބަބުން ފަހިވެގެންދާނެއެވެ.

ވާދޫ ލައިވްއިން ހާމަކޮށްފައިވާ ގޮތުގައި، މި ނޫހަކީ އަބަދުވެސް މުޖުތަމައުގެ ކުރިއެރުމާއި ތަރައްގީއަށް މަގުފަހިވާނެ ފަދަ ކަންކަމަށް އިންވެސްޓްކުރުމުގައި ދެމިއޮންނާނެ ފަރާތެކެވެ. މިފަދަ އެހީތަކުގެ މަގްސަދަކީ ދަރިވަރުންގެ ހުނަރުތައް ކުރިއެރުވުމަށް ބޭނުންވާ ވަސީލަތްތައް ފޯރުކޮށްދިނުމެވެ.