ރާއްޖެއިން އަލަށް ދެ މީހަކަށް ހިމަބިހި ޖެހި، ޖުމްލަ އަދަދު 22 އަށް!

މާލެ ސަރަހައްދުން އަލަށް ފެނުނު ދެ ކޭހާއެކު، މިއަހަރުގެ މިހާތަނަށް ރާއްޖެއިން ހިމަބިހި (މީސްލްސް) ޖެހުނު މީހުންގެ ޖުމްލަ އަދަދު 22 އަށް އަރާފައިވާ ކަމަށް ހެލްތު ޕްރޮޓެކްޝަން އެޖެންސީ (އެޗްޕީއޭ) އިން ބުނެފިއެވެ.

އެޗްޕީއޭއިން ހާމަކޮށްފައިވާ ގޮތުގައި، އަލަށް ފެނުނު ދެ ކޭސްވެސް ރިޕޯޓްކޮށްފައިވަނީ މާލެ ސަރަހައްދުންނެވެ. އަދި މިހާތަނަށް ބައްޔަށް ޕޮޒިޓިވްވި މީހުންގެ ތެރޭގައި ގިނައީ 18 އަހަރުން މަތީގެ ދިވެހިންނެވެ.

ބަލި ފެތުރުން ކޮންޓްރޯލް ކުރުމުގެ ގޮތުން އެޗްޕީއޭއިން ދަނީ ގިނަ މަސައްކަތްތަކެއް ކުރަމުންނެވެ. އެގޮތުން ބަލިޖެހުނު މީހުންނާ ދިމާވި (ކޮންޓެކްޓްވި) 489 އަށްވުރެ ގިނަ ފަރާތްތައް ދެނެގަނެ، އޭގެ ތެރެއިން ވެކްސިންގެ ދެ ޑޯޒް ހަމަނުވާ މީހުންނަށް ވެކްސިން ދިނުމުގެ މަސައްކަތް ވަނީ ފަށާފައެވެ. މީގެ އިތުރުން ފްރަންޓްލައިން ހެލްތުކެއާ ވޯކަރުންނަށްވެސް ބޫސްޓާ ޑޯޒް ދިނުން ކުރިއަށްދާކަމަށް އެޗްޕީއޭއިން ބުނެއެވެ.

ހިމަބިހީގެ ކަންކަމަށް ޚާއްސަކޮށްގެން އައިޖީއެމްއެޗްގައި މިހާރު ވަނީ ހެލްޕް ޑެސްކެއް ގާއިމުކޮށްފައެވެ.

އެޗްޕީއޭއިން ވަނީ ހުން އައުމާއެކު ހަމުގައި ރަތް ބިހި ނެގުން، ކެއްސުން، އަދި ލޯ ރަތްވުން ފަދަ އަލާމާތެއް ފެނިއްޖެނަމަ ލަސްނުކޮށް ޑޮކްޓަރަށް ދެއްކުމަށާއި، ހޮސްޕިޓަލަށް ދާއިރު މާސްކު އެޅުމަށް އިލްތިމާސްކޮށްފައެވެ. އަދި ބައްޔަށް ޝައްކުކުރެވިގެން ޓެސްޓު ހަދައިފިނަމަ، ނަތީޖާ ލިބެންދެން އެކަހެރިވެގެން އުޅުމަށްވެސް ވަނީ އަންގާފައެވެ.

ރާއްޖެއަކީ 2017 ވަނަ އަހަރު ހިމަބިހި ނައްތާލެވިފައިވާ ގައުމެއްގެ ގޮތުގައި ކަނޑައަޅާފައިވާ ގައުމެކެވެ. ނަމަވެސް، ވެކްސިން ފުރިހަމަނުކުރާ ފަރާތްތައް އުޅުމުގެ ސަބަބުން ބަލި އަލުން ފެތުރުމުގެ ފުރުސަތު ބޮޑެވެ.